1. F’din it-triq politika li qbadt, jew li nqabdet għalija, tgħallimt li ħidma rilevanti tista’ sseħħ biss jekk din tkun ibbażata fuq il-verità. Kull ġimgħa f’dawn l-artikli, u oħrajn li jinkitbu minni, sabiex infittex il-verità. Nibni l-argumenti politiċi b’dak li nkun qiegħed inqis, bil-fatti, bl-esperjenzi u bl-opinjonijiet varji. Nista’ minflok nieqaf, inkella agħar, ngħix u nsostni dik li mhix il-verità: il-gidba. Iltqajt ma’ numru ta’ persuni li wettqu dan is-servizz żbaljat. Dawk li sostnew politiċi oħra f’din it-triq tan-nuqqas ta’ verità. Inkella ta’ dawk li kienu huma stess dawk li kkonvinċew lil dawn il-politiċi u magħhom parti mill-poplu fil-kontra tas-sewwa. Rajt ħafna stilel politiċi jaqgħu f’hekk. Rajt diversi ‘suppost’ proġetti politiċi ‘progressivi’ jġibu l-ħsara u traġedji umani.
Aktar illum
2. Dan aktar illum quddiem elettorat li, għall-kuntrarju ta’ dak li wħud jaħsbu, huwa ferm iktar attent minn qabel. Il-votant immatura ħafna aktar, u dan wara l-aħħar esperjenzi qarsa u varji ta’ dawn l-aħħar għaxar snin. Fil-kalatura hemm l-għarfien li hemm differenza bejn min jidħol fil-politika għall-oħrajn, u min jidħol fiha għalih innfisu. Eżami ferm iktar rigoruż li sa issa ftit iridu jagħrfu. Proprju għalhekk li, fil-mument attwali ta’ pajjiżna, għandna d-dmir inwieġbu aħjar għas-sejħa naturali għal politika verament tajba minn daqshekk ieħor politiċi tajbin. Dan aktar u aktar illum meta għaddejjin minn kriżi nazzjonali.
Kumplikata
3. Huwa iktar ċar li l-pajjiż għandu din il-pożizzjoni għax għandu Gvern li daħal f’wisq basal. Din is-sena, il-każijiet ma qatgħu xejn. Wieħed wara l-ieħor. Kumulu, ġabra li ġejjin mill-passat, imma flimkien mad-diversi oħra li kellna llum. Oġġettivament, f’dan kollu l-Partit Laburista għandu l-bżonn li joħroġ barra mill-poter biex jerġa’ jsib lilu nnifsu. Wisq azzjonijiet żbaljati li qed jiġu assoċjati mal-istorja u l-ideali tiegħu. Il-korruzzjoni, l-illegalità, in-nuqqas ta’ għaqal huma assoċjati miegħu u ma’ numru ta’ politiċi li huwa ressaq ’il quddiem. Ma’ dawn, il-politika xejn fuq ix-xellug, u anzi, mimlija lemin aktar mil-lemin. Xenarju xejn sabiħ meta tqis minn fejn beda: dak li kien jgħid u dak li għamel, min kienu l-ministri tiegħu fl-2013 u kemm minnhom telqu. Il-pajjiż qiegħed jirreaġixxi għal dan. Hemm tnaqqis qawwi fil-voti għalih proprju għax hemm votant attent u li ma jridx ikun parti minn dak li kien għaddej u li għadu għaddej. Hawn togħma morra li qed tinħass. Tista’ taħrabha u tista’ taċċettaha, inkella tirreaġixxi għaliha.
Awto-kritika
4. Fuq linja pożittiva nara li fil-Partit Laburista nbeda proċess ta’ kritika nterna minn barra. Naqra diversi artikli li jridu jgħidu iktar milli qegħdin jgħidu. Imma dan mhux biżżejjed. Fis-sens li minn dak li jgħidu ulied l-istatistika, dak li qed jingħad mill-poplu u r-reazzjonijiet li kellna tul din il-ġimgħa, it-Tnejn stess, m’aħniex, bħala Oppożizzjoni, navvanzaw. Irridu nistaqsu aktar lilna nfusna għala l-Partit Laburista jnaqqas, u aħna ma nżidux? Għala, f’din il-lista interminabbli ta’ dnubiet mortali politiċi mill-iktar ħoxnin, nibqgħu fejn aħna? Nippruvaw, fi proċess ta’ verità nifhmu għala, wara sena li fiha rajna l-iskandlu tal-Isptarijiet, il-kwistjoni tat-terminazzjoni tal-ħajja fil-ġuf, il-każ tal-ġuvnott innoċenti Jean Paul Sofia, il-qtugħ tad-dawl fl-eqqel tas-sajf, u issa, b’dan l-iskandlu mill-iktar kundannabbli fis-settur tas-servizzi soċjali, bqajna statiċi ’l isfel?
Ippruvajna
5. Ma nistgħux ngħidu li ma sarux diversi sforzi. Uħud qbilt magħhom, oħrajn inqas. Imma, b’xi mod, il-Partit Nazzjonalista pprova, u għadu, biex joħroġ minn din il-pożizzjoni. Ningħaqad ma’ diversi fl-isforzi tiegħi biex ikun hemm il-bidla. Kif nipprova nagħmel dan ċar għal min isegwini fil-kitba u fil-ħidma politika tiegħi. Imma, jidher ċar, li dan mhuwiex biżżejjed. Wara li għaddejna milli għaddejna, b’bidliet qawwija li huwa ċar li ma ġewx apprezzati minn parti mill-elettorat tagħna, għandna nieqfu nirriflettu. Nistgħu f’dan naħsbu li huwa tajjeb li ngħaddsu rasna u nibqgħu sejrin qisu mhu xejn, ngħixu fil-bużżieqa tagħna, jew inkella, fuq in-naħa l-oħra, nifhmu u nibdlu.
Il-Pajjiż
6. Xi ħaġa mhux qegħda taħdem bejn dak li aħna jew qed nidhru li aħna, u huwa dan li l-pajjiż qiegħed jistenna minna. Iktar u iktar fid-dawl li x-xenarju nbidel kompletament. Jekk qabel kien hemm attività politika da parti tagħna għax nemmnu li l-pajjiż jitmexxa aħjar b’Partit Nazzjonalista, illum hemm raġunijiet nazzjonali. Illum hemm il-bżonn, in-neċessità urġenti għall-ġid tal-pajjiż, li jinbidel il-Gvern. Sija għall-partit stess li qiegħed fil-poter, kif ukoll għall-poplu, li jrid ideat u żiffa ġdida. L-istatistika tipprova, qegħda turi proprju dan fin-nuqqas tas-saħħa u appoġġ lill-Partit Laburista. Anzi, hemm issa l-partit ta’ dawk li jridu jeżerċitaw id-dritt li ma jivvutawx. Forsi wħud huma komdi b’dan, fis-sens li ma jridux jippruvaw iġibuhom lura biex jivvutaw. Imma jien ma nikkunsidrax ruħi fosthom u magħhom.
Swing out
7. Nistaqsi: jekk hemm din is-sejħa għall-bidla, m’għandux ikun li aħna nwieġbu għaliha? M’għandniex, f’dan, l-abbiltà politika li nidħlu għaliha? M’għandniex il-kuraġġ li qiegħed jintalab minna li nimxu ’l quddiem? M’aħniex kapaċi nippruvaw nifhmu aħjar fejn aħna, u fejn l-elettorat nazzjonali jridna nkunu biex ikun hemm futur aqwa għal dawn il-gżejjer mimlija bil-problemi? Nista’ nifhem li hemm il-kumplikazzjonijiet umani, imma fil-verità diversi huma nteressati mhux li jħarsu lejn il-passat, imma lejn il-futur. Dak li seħħ issa seħħ, u ma tistax treġġgħu lura. Iżda tista’, minflok, tibni verament ’il quddiem billi tħares lejn il-verità u r-realtà.
Nimxu ’l quddiem
8. F’dan kollu hemm bżonn qawwi li nifhmu li d-dmir tagħna hu li nimxu ’l quddiem. Il-prospett li l-affarijiet jibqgħu kif aħna llum għandu jmexxina biex nifhmu aħjar. Għall-ġid tal-pajjiż, il-Partit Nazzjonalista għandu jħares iktar esternament biex jidħol fir-responsabbiltà politika diffiċli ħafna li jipprova jsewwi u jiddritta dak li tkisser u tgħawweġ f’dawn is-snin. Irid jifhem dmiru u jaġixxi nternament fid-dawl ta’ dak li qiegħed jingħad mill-fatti. Nemmen li, bl-esperjenza tagħna, dan jista’ jsir: b’attenzjoni u b’għaqal. Nemmen li wieħed għandu jinsisti li tingħad il-verità, u biha, wieħed jaqleb il-folja mill-ġdid. F’dan, kull mument huwa opportun. Kull mument huwa tajjeb biex, fit-tfittxija tal-verità, nimxu ’l quddiem, u dan biex ma nibqgħux iktar fl-Oppożizzjoni.
No comments:
Post a Comment