HOME EQUITY RELEASE FOR PENSIONERS

 13778. L-ONOR. CARMELO MIFSUD BONNICI staqsa lill-Ministru għall-Finanzi u s-Servizzi Finanzjarji: Jista’ l-Ministru jgħid x’pożizzjoni u x’passi ttieħdu dwar ’l hekk indikata Home Equity Release for Pensioners f’dawn l-aħħar sentejn?

20/04/2020

ONOR. EDWARD SCICLUNA: Ngħarraf lill-Onor. Interpellant li wara li f’Settembru tal-2019, ġew ippubblikati r-Regolamenti dwar l-Equity Release Financial Products, f’Ottubru tal-2019, l-Awtorità għas-Servizzi Finanzjarji, l-MFSA, li hija l- Awtorità kompetenti biex tissorvelja dawk l-entitajiet li qed joffru dan il-prodott lill-pensjonanti, ppublikat regoli dwar l-applikazzjoni li trid tiġi sottomessa mingħand il-banek u l-istituzzjonijiet finanzjarji li jixtiequ jibdew joffru dan il-prodott. 

Dan ifisser li l-ebda istituzzjoni finanzjarja ma tista’ tibda toffri dan il-prodott jekk ma tkunx reġistrata mal-Awtorità.  Apparti minn hekk, f’ Jannar ta’ din is-sena, l-Awtorità ħarġet ukoll sett ta’ regoli li jridu jkunu segwiti minn dawn l-istituzzjonijiet li qed joffru dan il-prodott fuq bażi kontinwa. 

Fil-ġimgħat li għaddew, l-Awtorità rċeviet applikazzjoni minn bank partikolari biex toffri dan il-prodott. 

Seduta 321

27/04/2020