AMBAXXATA TA’ MALTA FL-EĠITTU - ĦIDMA

10545. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Promozzjoni tal-Kummerċ: Jista’ l-Ministru jelenka x’ħidma saret fl-Ambaxxata tagħna ġewwa l-Kajr, l-Eġittu fl-ewwel erba’ xhur ta’ din is-sena?

17/06/2019

  

 ONOR. CARMELO ABELA:  Nixtieq ninforma lill-Onoroveli Interpellant li l-ħidma li saret fl-Ambaxxata tagħna ġewwa l-Kajr, l-Eġittu fl-ewwel erba’ xhur huma:

Bilaterali

Eġittu

· Analiżi kontinwa u regolari, tas-sitwazzjoni politika fil-pajjiż. Diskussjonijiet regulari fuq żviluppi fl-Eġittu mal-Ambaxxaturi tal-pajjiżi ta’ l-UE.

· Taħdidiet regulari mal-Ministeru tal-Affarijiet Barranin tal-Eġittu dwar relazzjonijiet bilaterali u djalogu politiku.

· Taħdidiet regolari mal-Ministeru tal-Affarijiet Barranin tal-Eġittu u mal-Uffiċċju tas-Servizzi tas-Sigurtà Egizzjan fir-rigward tas-sigurtà domestika. L-Eġittu huwa formalment taħt stat kontinwu ta’ emerġenza minħabba periklu ta’ attaki terroristiċi.

· Laqgħat mal-Assistent Ministru tal-Affarijiet Barranin għall-Affarijiet Parlamentari biex jiġu diskussi kooperazzjoni u interessi komuni (bħal PAM).

· Promozzjoni ta' boroż ta’ studju. Laqgħat skont it-tema tal-borża ta’ studju (bħal MEDAC u-Sigurtà Marittima).

· Diskussjonijiet informali mal-Ministru tal-Antikitajiet tal-Eġittu waqt diversi laqgħat u żjarat li sejjaħ dan il-Ministeru stess.

Sudan

· Analiżi kontinwa u regolari tas-sitwazzjoni politika fil-pajjiż. Diskussjoniet regulari mal-Ambaxxaturi tal-pajjiżi tal-UE għas-Sudan (14-ilpajjiż akkreditat mill-Kajr).

· Korrispondenza kontinwa mal-awtoritajiet tas-Sudan fir-rigward ta’ taħdidiet fuq il-migrazzjoni u l-possibiltà li jibdew isiru l-konsultazzjonijiet politiċi.

· Laqgħa mal-Ambaxxata Sudaniża fil-Kajr. Temi ta’ diskussjoni: relazzjonijiet bilaterali u ECLASLO

Multilaterali

· Laqgħat bilaterali informali ma’ Ambaxxati diversi u li huma akkreditati għal-Lega Għarbija (LAS). Temi ta’ diskussjoni: relazzjonijiet bilaterali u ECLASLO.

· Tħejjija u parteċipazzjoni fil-Laqgħa Għolja UE-LEGA GĦARBIJA (LAS) ġewwa Sharm El Sheikh.  L-Ambaxxata ħadet ħsieb ukoll l-arranġamenti kollha mad-Dipartament tal-Protokoll li attendew għaliha l-PM u l-Ministru għall-Affarijiet Barranin. Din kienet l-ewwel Laqgħa Għolja bejn l-UE u l-LEGA GĦARBIJA li serviet bħala bażi soda għal diskussjonijiet futuri. Il-laqgħa affermat mill-ġdid ir-rabtiet politiċi u soċjali b'saħħithom bejn l-UE u l-LEGA GĦARBIJA. Din il-Laqgħa Għolja serviet ukoll bħala opportunità għall-Ministru għall-Affarijiet Barranin u l-Prim Ministru biex iwettqu numru ta’ kuntatti informali mal-kontropartijiet tagħhom fir-reġjun. Ġiet ippreparata stqarrija - għalkemm fl-aħħar ma ġietx adottata minħabba li ma kienx hemm ftehim finali dwar kwistjonijiet sensittivi għaż-żewg naħat (migrazzjoni u drittijiet tal-bniedem). Qabel u waqt il-Laqgħa Għolja saru sforzi diplomatiċi sinjifikanti biex tiġi żgurata l-attenzjoni u l-importanza dovuta lill-ECLASLO. F’dan ir-rigward saru kuntatti informali ma’ numru ta’ Ambaxxaturi, b’mod partikolari mal-Ambaxxaturi tas-Sudan, l-Eġittu, il-Libanu, l-Alġerija u Ġibuti. Min-naħa tal-UE, l-Ambaxxatur ta’ Malta fil-Kajr kellu diskussjonijiet mal-Irlanda, il-Greċja, Ċipru kif ukoll Spanja. L-Ambaxxatur żamm kuntatt kontinwu mal-Kap tad-Delagazzjoni tal-UE fejn iddiskutew żviluppi.

· Waqt li kien f’Sharm El Sheikh għal-Laqgħa Għolja tal-UE u l-LEGA GĦARBIJA, il-Ministru għall-Affarijiet Barranin kellu laqgħa formali mal-Ministru għall-Affarijiet tal-Ġibuti. Tħejjijiet għal din il-laqgħa bilaterali saru wkoll mill-Ambaxxata ta’ Malta fil-Kajr.

Kummerċjali

Eġittu

· Analiżi kontinwa tas-suq lokali u opportunitajiet li jeżistu.

· Taħdidiet mal-awtoritajiet pertinenti rigward is-Servizzi tal-Ajru.

· Diskussjonijiet informali mal-uffiċjali tal-Air Malta dwar il-possibiltà li jerġgħu jiddaħħlu titjiriet lejn il-Kajr.

· Taħdidiet maċ-Chairman tal-Kunsill Kummerċjali Eġizzjan għall-Kooperazzjoni Internazzjonali bil-ħsieb li l-Kunsill jintuża bħala pjattaforma għall-intraprendituri Maltin. Huwa antiċipat li ser isir iffirmar ta’ MOU bejn l-Ambaxxata u l-Kunsill f’Lulju li ġej.

Sudan

Bl-għajnuna tal-Konslu Onorarju f’Khartoum, grupp ta’ imprendituri Sudaniżi żaru Malta fl-aħħar ta’ April, bi skop li jinħoloq aktar kummerċ bejn Malta u s-Sudan. Waqt din iż-żjara saru żewġ laqgħat fis-settur tal-avjazzjoni, laqgħa fis-settur tal-informatika u tliet laqgħat fis-settur mediku.

Kulturali

· Evalwazzjoni kontinwa għal opportunitajiet fejn tista’ ssir promozzjoni tal-kultura Maltija. L-Ambaxxata organizzat taħdidiet informali mal-Opera House tal-Kajr biex tiddiskuti l-possibbiltà li ssir sfilata Maltija. L-Ambaxxata qed tipprepara d-dokumenti neċessarji biex tkun tista’ tipparteċipa fil-Cultural Diplomacy Fund li hu organizzat mill-Ministeru.

· L-Ambaxxata kellha taħdidiet mal-pjanista prominenti Dr Moshira Eissa fid-dawl tal-possibbiltà ta’ kunċert f’Malta. L-Ambaxxata qed tfittex sponsors biex dan il-proġett iseħħ.

Konsolari

· Skont statistika uffiċjali, minn Jannar sa April 2019, l-Ambaxxata pproċessat 464 viża. 323 kienu viżi SCHENGEN, filwaqt li nħarġu 50 D Viża. Min dawn il-viżi, l-Ambaxxata ipproċessat total ta’ 425 applikazzjoni Eġizzjana. L-applikazzjonijiet l-oħra kienu minn:

o Kamerun

o Gana

o Libja

o Niġerja

o Arabja Sawdija

o Afrika t'Isfel

o Sudan

o Sirja

o Yemen

o Żimbabwe

· Rendikont ta’ xogħol ieħor konsolari jinkludi:

o 93 awtentikazzjoni tad-dokumenti

o 12-ilPassaport

o 5 reġistrazzjonijiet tat-twelid.

· Bl-għajnuna tal-Konslu Onorarju ta’ Malta fis-Suez, numru ta’ nies ta’ dixxendenza Maltija irnexxielhom jiksbu ċertifikati tat-twelid u taż-żwieġ tal-antenati tagħhom li twieldu fl-Eġittu.

· Il-Konslu Onoraju, f'isem l-Ambaxxata, għen ukoll lill-bastimenti u vapuri Maltin jaqsmu l-Kanal ta' Suez billi ffaċilita ix-xogħol ta’ ġbir ta’ dokumentazzjoni għall-awtoritajiet Eġizzjani.

Promozzjoni ta' Malta

· Parteċipazzjoni fil-Bazaar Ewropea fejn il-qligħ jingħata lil-karitajiet lokali.

· Parteċipazzjoni f'ġurnata internazzjonali f'waħda mill-iskejjel lokali.

Oħrajn

Xogħol ta’ rinovar tal-Ambaxxata l-ġdida ta’ Malta fil-Kajr. Laqgħat mal-kuntratturi, koordinazzjoni ta’ xogħol u kuntratti.

Seduta  248

10/07/2019

NAZZJONIJIET UNITI - VOTI.

10544. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Promozzjoni tal-Kummerċ: Jista’ l-Ministru jgħid x’pożizzjoni ħadet u ċjoè kif ivvota pajjiżna fin-Nazzjonijiet Uniti tul l-ewwel erba’ xhur ta’ din is-sena fuq ir-riżoluzzjonijiet u proposti li tressqu?

17/06/2019

  ONOR. CARMELO ABELA:  Ninforma lill-Onor. Interpellant li dan huwa l-mogħod kif ivvota pajjiżna fin-Nazzjonijiet Uniti tul l-ewwel erba’ xhur ta’ din is-sena fuq ir-riżoluzzjonijiet u proposti li tressqu:

Resolution Number	Resolution Name	Malta’s voting pattern	Co-sponsorship
A/73/PV.282 15 January 2019	Commemoration of the one-hundredth anniversary of the establishment of the International Labour Organization	Adopted without a vote
A/73/PV.283 1 March 2019	The role of diamonds in fuelling conflict: breaking the link between the illicit transaction of rough diamonds and armed conflict as a contribution to prevention and settlement of conflicts	Adopted without a vote
A/73/284 1 March 2019	United Nations Decade on Ecosystem Restoration (2021-2030)	Adopted without a vote
A/73/PV.73 2 April 2019	Combating terrorism and other acts of violence based on religion or belief	Adopted without a vote
A/73/ 286 2 April 2019	International Delegate's Day	Adopted without a vote
A/73/287 15 April 2019	Joint Inspection Unit	Adopted without a vote
A/73/288 15 April 2019	Construction of a new facility for the International Residual Mechanism for Criminal Tribunals, Arusha branch	Adopted without a vote
A/73/289 15 April 2019	Progress towards an accountability system in the United Nations Secretariat	Adopted without a vote
A/73/PV.75 15 April 2019	Cooperation between the United Nations and the International Organization of la Francophonie	Adopted without a vote	MT Co-Sponsored
A/73/291 15 April 2019	Buenos Aires outcome document of the second High-level United Nations Conference on South-South Cooperation	Adopted without a vote
1 March 2019	United Nations Decade on Ecosystem Restoration (2021 – 2030)	In favour
2 April	Christchurch resolution	Adopted without a vote	MT Co-Sponsored

Nota: Ir-riżoluzzjonijiet u proposti li tressqu fil-Ħames Kumitat huma addottati b’kunsens u mingħajr kosponorizzazzjoni.

Seduta  248

10/07/2019

Il-familji u negozji qegħdin ibatu għan-nuqqas ta' pjan tal-Gvern li falla fil-politika tal-enerġija.

"Il-familji u n-negozji qegħdin ibatu għan-nuqqas ta' pjan tal-Gvern li minkejja li l-wegħdi dwar l-enerġija qabel l-elezzjoni ġenerali tal-2013 falla fil-politika tiegħu tal-enerġija.", hekk qal il-Kap tal-Partit Nazzjonalista Adrian Delia waqt intervista fuq NET FM.

Dr Delia qal li l-aħħar li l-prezzijiet tal-fuels kienu l-istess bħal tal-lum, l-Oppożizzjoni Laburista ta' dak iż-żmien kienet qed tgħajjat bil-prezzijiet u tniżżel lin-nies fit-toroq meta l-prezz internazzjonali taż-żejt dakinhar kien id-doppju ta' dak li huwa llum. Dan meta l-istatistika turi li l-prezz internazzjonali taż-żejt kellu l-akbar daqqa 'l isfel f'dawn l-aħħar erba' snin. Huwa qal li bħalissa qed tispikka s-silenzju min-naħa tal-Gvern għar-reazzjonijiet tal-Oppożizzjoni u tal-unjins, fejn qed jintalab li jingħata kumpens lill-familji għal dawn iż-żidiet tal-fuels. Iż-żieda fil-prezzijiet tal-fuels hija tat-tħassib ukoll għan-negozji ż-żgħar li diġà qegħdin ibatu biex ilaħħqu mal-ispejjeż li dejjem jiżdiedu. Dr Delia qal li l-Partit Nazzjonalista se jibqa' jitkellem fuq l-enerġija flimkien mal-istakeholders kollha f'dan is-settur.

Adrian Delia qal li l-ammont tal-karozzi fit-toroq tagħna huwa wieħed esaġerat. Dan meta l-istatistika turi li sal-aħħar ta' Ġunju kien hawn kważi 400,000 vettura fit-toroq f'Malta u Għawdex meta pajjiżna għandu fost l-agħar kwalità tal-arja fl-Ewropa u sfortunatament 600 jmutu kull sena minħabba mard respiratorju. Huwa qal li l-unika soluzzjoni tal-Gvern hija li jwessa' t-toroq u jżid in-numru tal-karozzi tal-linja, li imbagħad jispiċċaw jeħlu fit-traffiku. Meta l-Gvern għaddej bil-politika li jkabbar l-ekonomija bil-popolazzjoni bi 15,000 fis-sena, n-numru tal-karozzi fit-toroq se jibqa' jiżdied u se naslu f'punt ta' staġnar. Adrian Delia qal li jeħtieġ li jkollna sistema tat-trasport tal-massa li tkun effiċjenti, puntwali u b'ħarsien sħiħ tal-ambjent. Għall-Partit Nazzjonalista, l-ambjent huwa prijorità assoluta, għaliex mal-ambjent għandhom isiru l-investimenti l-oħra bħal sistema tat-trasport tal-massa li ma tħammiġx sabiex innaqsu l-mard u r-rata tal-imwiet minħabba l-arja mniġġsa. Dan biex il-Maltin u l-Għawdxin igawdu minn kwalità ta' ħajja aħjar. Il-PN diġà qed jaħdem fuq hekk u se jkun qed iressaq pjan fit-tul u effettiv.

Il-Kap tal-Partit Nazzjonalista Adrian Delia tkellem dwar ir-riforma fi ħdan il-partit immexxija minn Louis Galea u qal li l-PN se jkun qed iqajjem iżjed għarfien fost id-deputati, l-kunsillieri, l-membri u kull minn jimmilità fil-partit dwar kif jintużaw bl-aħjar mod il-mezzi soċjali, dan biex il-kritika tibqa' waħda kostruttiva. Adrian Delia qal li dan l-eżerċizzju se jwassal għal konferenza nazzjonali għall-benefiċċju ta' bosta setturi u oqsma, biex il-Partit Nazzjonalista jkun minn ta' quddiem fl-edukazzjoni dwar l-użu tal-mezzi soċjali.

In-negozji ż-żgħar qed ibatu mill-apatija tal-Gvern li jattira turisti ta' kwalità

Negozji żgħar fil-qasam tal-bejgħ tal-ikel u servizzi qegħdin jilmentaw li l-infiq mit-turisti mhux qed ilaħħaq ma' dak li kien mistenni minnhom. Ħafna negozji u ħwienet żgħar qed jistennew aħjar għaliex in-nefqa mhix tissodisfa l-investment li sar minn ħafna.

Il-Partit Nazzjonalista jinnota li l-Gvern mhux jagħmel biżżejjed biex jara li pajjiżna jkun pajjiż nadif u jibqa' attrazzjoni għal kull min jiġi jżurna jew fuq btala u t-telqa diżorganizzata qed tidher f'diversi oqsma. Minflok turisti ta' kwalità li jonfqu iżjed, sfortunatament Malta m'għadiex aktar il-prodott ta' kwalità għat-turisti ta' kwalità.

Il-PN jemmen li bħala pajjiż nistgħu nagħmlu akatar u nistgħu nkunu aħjar kemm għal min jgħix bħala resident kif ukoll għal minn jiġi jżur pajjiżna. Dan meta l-għoli tal-ħajja sar fattur li qed joħloq diffikultajiet għar-residenti u l-komunità kummerċjali.

Bħala Gvern alternattiv, il-Partit Nazzjonalista jinsab impenjat li jara li jaħdem mas-setturi kollha involuti biex pajjiżna jerga' jkun prodott ta' kwalità u jkun fl-aħjar pożizzjoni li jattira l-aktar persuni li jżuru pajjiżna li mill-konsum tagħhom igawdu wkoll in-negozji u l-ħwienet iż-żgħar.

Edwin Vassallo

Kelliem tal-Oppożizzjoni dwar is-Self Employed, in-Negozji ż-Żgħar, l-Koperattivi, l-Biedja u s-Sajd

02.08.2019

Stqarrija mis-Solidarjetà Ħaddiema Partit Nazzjonalista (SĦPN).

Is-Solidarjetà Ħaddiema Partit Nazzjonalista tesprimi d-diżappunt tagħha għal kif il-Gvern qed jgħolli prodotti essenzjali li qed iħallu impatt negattiv fuq il-kwalità tal-ħajja tal-ħaddiema Maltin u Għawdxin. Iż-żieda ta' 5 ċenteżmi fil-prezzjijiet tal-fuels kienet daqqa oħra f'sensiela ta' daqqiet li qed jaqilgħu l-familji Maltin.

Wara li l-Gvern ftaħar li l-prezz tal-fjuwil inżamm stabbli għal sena sħiħa meta l-prezz internazzjonali taż-żejt kien fost l-irħas li qatt kien, issa ddeċieda li jżid il-prezz meta l-prezz taż-zejt għadu fil-livell medju ta' $57-il barmil. 

Meta fis-sena 2012 Gvern Nazzjonalista raħħas id-diesel b'6 ċenteżmi u l-petrol b' 2 ċenteżmi, fi żmien li l-prezz medju taż-żejt kien saħansitra ta'$110-il barmil, il-Partit Laburista kien għamel plejtu sħiħ għax messu raħas iktar!.

Huwa insult u diżrispett lejn is-sewwieqa li l-prezz tal-fjuwil jiżdied fl-aqwa żmien li għaddej minnu pajjiżna! Zgur li ma zdiedx minħabba l-pagi tal-ħaddiema tal-Enemed li ħafna minnhom spiċċaw trasferiti fuq il-kotba tal-Gvern. Ta' min ifakkar ukoll li l-Gvern ftaħar li l-Enemed qed tagħmel il-qliegħ. Liema qliegħ qed isir a skapitu tal-familji Maltin!.

L-SĦPN titlob lill-Awtorita' tar-Riżorsi (ERA) sabiex tkun tarka għall-poplu Maltin kontra żiediet imposti mingħajr ġustifikazzjoni u li permezz tagħhom iġibu żidiet fuq ħafna prodotti u servizzi oħra. Żidiet li qed iseħħu minħabba l-inkompetenza ta' kif jinxtara ż-żejt. Dan fid-dawl li l-pagi tal-ħaddiema baqgħu ma żdidux. Dawn ma jinkludux lin-nies tal-qalba li raw żidiet fenomenali fil-pagi u allura jagħmlu minn kollox biex jiddefendu u jiġġustifikaw lill-Gvern.

L-SĦPN tfakkar ukoll li dawn iż-żidiet qed iseħħu ftit ġranet wara li tħabbru żidiet sostanzjali fil-prezz tal-prodotti essenzjali fosthom il-ħalib. L-SĦPN tħeġġeġ lill-unjins u l-għaqdiet tal-pensjonanti sabiex huma wkoll isemmgħu leħinhom.

Il-ħaddiema u l-familji jkomplu jġorru l-piż tort ta' Gvern li tilef kull sens ta' ġustizzja soċjali

Iż-żieda fil-prezz tal-fuels, b'effett mil-lum, l-1 ta' Awwissu, żieda ta' ħames ċenteżmi jfisser li s-sewwieqa se jkunu qed iħallsu għat-tielet żieda f'dawn l-aħħar 18-il xahar fil-prezzijiet tal-petrol u tad-diesel. Mhux biss għanda wiegħda oħra tal-Gvern li qed tinkiser, iżda għal darb'oħra dan il-piż  se jkollhom iġorruh il-ħaddiema u l-familji Maltin u Għawdxin.

Meta l-prezz tad-diesel fl-2011 kien €1.28, l-prezz ta' barmil żejt kien $103.01 u llum għall-istess prezz tad-diesel li se jħallas l-poplu malti €1.28, il-prezz ta' barmil żejt huwa $65.31. Iż-żieda fil-prezz tal-fuel se tkompli tagħsar lill-ħaddiema li minbarra li se jħallsu iktar għall-fuel, qed jaħlu iżjed ħin imwaħħlin fit-traffiku.

Fl-istess ġranet taż-żidiet fil-fuels, il-familji raw ukoll żidiet fi prodotti oħrajn essenzjali fosthom il-ħalib; żieda ta' 10 u 11-il ċenteżmu rispettivament il-kartuna, b'effett minn din il-ġimgħa stess li hija daqqa oħra fil-kwalità tal-ħajja tal-familji Maltin u Għawdxin, speċjalment dawk bi dħul baxx u medju. Dawn iż-żidiet qed isiru minkejja l-ftaħir tal-Gvern li fil-budget mhux qed iżid il-piż fuq il-familji u n-negozji. 

Dawn iż-żidiet jistonaw mal-ftaħir tal-Gvern li jgħid li l-ekonomija qed tikber. Il-ġustizzja soċjali titlob li l-ġid jasal għand kulħadd u mhux il-ħaddiema u l-familji qed ikollhom iġorru huma l-piżijiet, tort ta' Gvern li tilef kull sens ta ġustizzja soċjali.

David Agius

Viċi Kap għall-Affarijiet Parlamentari u Kelliem tal-Oppożizzjoni dwar l-Enerġija u Immaniġġjar tal-Ilma

Il-Kap tal-Oppożizzjoni Adrian Delia jiltaqa' mas-Segretarja Ġenerali tal-Commonwealth

Il-Kap tal-Oppożizzjoni Adrian Delia ltaqa' mas-Segretarja Ġenerali tal-Commonwealth Patricia Scotland fid-Dar Ċentrali tal-Partit Nazzjonalista. Matul din il-laqgħa ġiet diskussa l-irwol importanti li għandha l-Commonwealth fir-rigward tal-ġlieda kontra t-tibdil fil-klima.

Malta u pajjiżi oħra żgħar kienu minn ta' quddiem fost il-pajjiżi fid-dinja li tkellmu dwar it-tibdil fil-klima. Fl-1989, il-Commonwealth kienet l-ewwel entità li kienet stqarret kif it-tibdil fil-klima hija ta' importanza kbira u għandha tiġi indirizzata għaliex hi theddida reali għall-bniedem u d-dinja, u dan b'mod speċjali għall-Istati żgħar u l-gżejjer.

Dr Delia qal li jeħtieġ li nibdew inħarsu wkoll lejn ir-riżorsi tad-dinja tagħna u l-mod kif il-bnedmin qegħdin jikkonsmaw dawn ir-riżorsi. Huwa qal li l-varjetà ġeografika tal-pajjiżi li jiffurmaw il-Commonwealth hija ta' vantaġġ għall-vuċi favur il-ħarsien tal-ambjent fil-ġlieda kontra t-tibdil fil-klima. Adrian Delia qal li għalhekk il-Commonwealth tista' sservi ta' pjattaforma biex il-vuċi tan-nies tkun iżjed b'saħħitha.

Is-Segretarju Ġenerali tal-Commonwealth Patricia Scotland qalet li l-Commonwealth tista' tibqa' tkun pjattaforma ta' opportunità sabiex tkun il-leħen tal-Istati żgħar. Hija qalet li qabel Paris 2020, l-pajjiżi kollha tal-Commonwealth kienu qabblu fuq miri globali fosthom it-tnaqqis fit-temperatura, u dawn l-istess miri ssarrfu fil-bażi maqbula fil-ftehim Paris 2020.

Jakkumpanjaw lill-Kap tal-Oppożizzjoni Adrian Delia għal din il-laqgħa mas-Segretarja Ġenerali tal-Commonwealth Patricia Scotland kien hemm ukoll il-Kelliem tal-Oppożizzjoni għall-Affarijiet Barranin u l-Promozzjoni tal-Kummerċ Carmelo Mifsud Bonnici u s-Segretarja Internazzjonali tal-Partit Nazzjonalista Roselyn Borg Knight.