17189. L-ONOR. CARMELO MIFSUD BONNICI staqsa lill-
Ministru għat-Trasport, Infrastruttura u l-Proġetti Kapitali: Jista’ l-Ministru
jgħid kemm damet sabiex issir Triq il-Kapuċċini fil-Kalkara fit-tiswijiet u
xogħol li sarilha?
09/11/2020
ONOR. IAN
BORG: Ninforma lill-Onorevoli Interpellant li t-titjib fl-infrastruttura ta’
pajjiżna jinsab fuq quddiem nett tal-ħidma ta’ dan il-Gvern. Dan l-impenn qed
jitwettaq permezz ta’ pjan ta’ ħidma b’investiment bla preċedent biex fis-snin
li ġejjin inkomplu ntejbu l-kwalità, l-effiċjenza, s-sostenibilità u
s-sigurezza tal-infrastruttura tat-toroq fil-pajjiż.
Bħala parti minn dan
l-investiment, Infrastructure Malta bħalissa qed twettaq ħafna proġetti biex
ittejjeb is-sigurezza u s-sostenibilità tas-sistema tat-toroq ewlenin, toħloq
infrastruttura ta’ kwalità u ambjent aħjar fit-toroq residenzjali f’kull
lokalità u tibni mill-ġdid ukoll ħafna toroq sekondarji oħra, fosthom kilometri
ta’ toroq rurali fil-kampanja. Fil-ftit żmien kemm ilha li twaqqfet, l-aġenzija
diġà bniet mill-ġdid u għamlet titjib f’aktar minn 470 triq.
It-triq indikata hija fost
120 triq residenzjali li Infrastructure Malta bniet mill-ġdid fl-2020.
Ix-xogħlijiet fiha bdew aktar kmieni din is-sena u tlestew fil-jiem li għaddew.
Billi t-triq hija twila mhux ħażin, madwar 600 metru minn ħdejn il-Kappella ta’
Santa Barbara u tasal sax-xatt tal-Kalkara, ix-xogħlijiet kienu estensivi u
saru f’żewġ fażijiet.
F’din it-triq ġew mgħoddijin
minn taħt l-art aktar minn kilometru f’servizzi tal-ilma, telekomunikazzjoni u
drenaġġ. Saru wkoll bankini ġodda fuq iż-żewġ naħat tat-triq li jġibu l-istess
tul, tisħiħ tal-pedamenti tat-triq u wiċċ ġdid b’diversi saffi t’asfalt.
Intennu l-impenn tagħna li
nkomplu naħdmu bla heda biex nagħtu ambjent aħjar u kwalità ta’ ħajja aħjar
lill-familji fil-lokalitajiet kollha f’pajjiżna.
Seduta 400
16/11/2020
