IMĦABBAR

1. Wasalna fi tmiem ir-Randan. Forsi wkoll, ma nagħrfux biżżejjed is-sens u l-għerf ta’ missirijietna li rabtuna ma’ tradizzjoni tant mimlija sustanza.

2. Sustanza li tidħol fiha u titpaxxa. Titpaxxa f’sens li tieħu pjaċir tiskopri dak li ma tafx. Qisek tħossok qed tinfirex fejn ġismek irid jinfirex.

3. Il-bniedem irid jitgħallem. Il-bniedem jitpaxxa meta jiltaqa’, jew aħjar, meta jħossu qiegħed jersaq lejn l-għerf. Iżda din ma hix illużjoni; hija verità.

4. Hemm min jifred il-verità mir-reliġjon. Min jaħseb li waħda m’għandhiex x’taqsam mal-oħra. Ifittex, iżda ma jafx jinterpreta tajjeb dak li moħħu jrid. Itih l-iżball. Itih il-firda ineżistenti tat-twemmin mill-verità.

5. Sidna Ġesù Kristu kien imħabbar li se jiġi. Imħabbar mhux biss fid-dettall kbir u ċar lil-Lhud, iżda wkoll lil diversi razez oħra. Iċ-Ċiniżi, il-Griegi, ir-Rumani kollha kitbu fuq Dak li għad jiġi. Kien imħabbar mhux biss lil-Lhud iżda wkoll lil oħrajn. Din hija l-verità miktuba.

6. Hija bluha li ma naċċettawx li dak li qegħdin infakkru seħħ fil-verità. Seħħ bi pjan Divin, u għalhekk il-mewt u l-qawmien Tiegħu mhumiex immaġinazzjoni, iżda verità.