Verità u illużjoni.

1.             L-għażliet fil-ħajja politika huma, ħafna drabi, diffiċli.  Diversi kunsilliera, tul dawn il-ġimgħat, kienu bejn ħalltejn lil min, mill-erba’ kandidati li b’ġenerożità resqu ‘l quddiem, sejrin jivvutaw.  Jum wara jum smajt argumenti varji.  Rajt nies deċiżi b’mod, li wara, bidlu fehemthom.  Ħafna ħassewhom f’diffikultà kbira għax hemm imħabba kbira għal dan il-partit li aħna lkoll parti minnu.  Smajt min ried li ma ddeċidejniex daqshekk malajr.  Dawk li riedu li jkollhom aktar ħin biex jaħsbu u jgħarblu sewwa.  Nafu lkoll li l-kunsilliera huma bnedmin li ma jitmexxewx fejn ma jridux.  Iridu jkunu ċerti minn dak li sejrin jagħmlu.  Iridu kap li jmexxi tajjeb u jikseb, l-ewwel,  il-fiduċja sħiħa tagħhom u wara jibda t-triq lejn is-servizz li l-elettorat jagħżel minnu.

2.             Hemm sejħa kbira minn fost il-membri tal-partit sabiex nimxu ‘l quddiem b’għaqal u mhux b’għaġġla.  Li nħarsu ‘l quddiem biex nibnu sewwa fuq il-valuri demokratiċi nsara tagħna.  Diversi ħassew li, hu min hu li sejjer jiġi nkurunat kap, irid iżomm lilu nnifsu ankrat mal-fatt li aħna partit demokristjan.  M’aħniex bnedmin li għandna għamad fuqna li ma nifhmux u ma nirraġunawx, imma li għażilna fil-libertà assoluta tagħna li nimmilitaw f’partit għax għandu prinċipju.  Ħafna telqu ħajja differenti biex jiddedikaw l-enerġija u l-isforzi tagħhom biex iwettqu s-sewwa permezz tal-partit politiku.  Hemm għażla ċara.

3.             Jekk ma nkunux kapaċi nidentifikaw lilna nfusna, ħaddieħor sejjer iċekkinna.  Jekk aħna m’aħniex kapaċi ngħarfu li, mingħajr dak li aħna, sejrin naqbdu triq fid-deżert.  Waħda li ż-żmien jgħidilna meta noħorġu minnu.  L-elettorat tagħna jfittex is-sustanza, ifittex il-verità u min jidħaq bih darba ma jkunx lest li jerġa’ jafdah.  Hemm ħafna studji fuq il-perċezzjoni, fuq l-illużjoni li tista’ tuża biex tidħak bil-poplu.  Biss dawn, fl-aħħar tal-ġurnata, jsarrfu f’reazzjonijiet varji u kontro-indikattivi.  Il-pajjiż irid dejjem iktar verità u inqas purċinellati, pożi jew daħk fil-wiċċ.  Jekk aħna m’aħniex kapaċi nkunu dak li aħna, allura għandna problema aħna stess u l-elettorat tagħna.

4.             Ngħid iktar dan għax għalkemm għaddew kważi xahrejn mill-elezzjoni ġenerali, il-Partit Laburista diġà qiegħed jitlef mill-kunsens li ħadem għalih.  L-għażliet li qed isiru f’bordijiet varji m’humiex jinżlu tajjeb ma’ diversi.  Anzi, saru s-suġġett taz-zekzik u l-għidut ta’ kuljum.  Għax ma’ kull ġurnata nibdewha b’min issa laħaq hemm u min laħaq hawn u iktar ta’ min irid jilħaq ‘l hemm u ‘l hawn.  Tisma’ stejjer varji ta’ min ried ħaġa u ħa oħra, u min baqa’ b’xiber imnieħer.  Hemm ġirja interessanti li minnha l-pajjiż qed jifforma l-opinjoni li semgħu diska fl-elezzjoni ġenerali li ma qalitx il-verità.

5.             Il-Partit Nazzjonalista tilef l-elezzjoni ġenerali u għalkemm hemm min qiegħed jara ħafna dlam, fir-realtà dan m’huwiex minnu.  Diversi imma għandhom il-ħeġġa u d-determinazzjoni biex nimxu ‘l quddiem.  Mhux l-ewwel darba li konna fl-Oppożizzjoni, anzi għandna l-konfort li l-aħħar darba li konna hemm domna biss ftit xhur.  Ħafna persuni lesti jagħtu l-impenn tagħhom magħna sabiex nerġgħu nibnu programm ta’ ħidma biex, l-ewwel, nissudaw l-oppożizzjoni parlamentari; u t-tieni, nsarrfu lilna nfusna fi strumenti ta’ bidla għall-aħjar fil-ħajja soċjo-ekonomika ta’ pajjiżna.  Jilħaq min jilħaq kap tal-partit, m’għandix dubju li ser jagħraf dan.  Ser jagħraf li l-politika li rebħet kienet dik li bbażat ruħha fuq il-verità u mhux fuq l-illużjoni.  Fuq dik li twettaq il-ġid lill-bniedem u mhux li ċċekknu.