Ħmistax-il jum interessanti

1.    Kemm huwa minnu dak li jgħidu li l-jum fil-politika huwa itwal minn dak normali.  Inħares lura lejn l-aħħar sebat’ijiem u ‘l quddiem lejn dawk li ġejjin.  Fuq dak li seħħ nistgħu nitkellmu ferm aħjar milli fuq dak li għadu le, għalkemm nibqgħu nipprospettaw u nħarsu ‘l quddiem.  Kienet ġimgħa mimlija attività.  Bdejt biż-żewġ laqgħat ġewwa l-Kumitat Permanenti dwar ix-Xogħol tal-Kamra li fihom stajt immiss b’idejja kemm, fi ħdan il-Parit Laburista, it-temperatura politika telgħet ‘il fuq.  Pressjonijiet, deċiżjonijiet u direzzjonijiet li ħarġu ndikawli b’mod mill-iktar ċar li ġewwa dak il-partit għaddejjin kurrenti qawwija. 

2.    Il-pożizzjoni min-naħa tagħna kienet ċara mill-bidu.  Mozzjoni ta’ sfiduċja mhux ser naħirbu minnha.  Naffrontawha, nieħdu sehem fiha u fl-aħħar, nivvutaw.  F’ebda mument ma ndikajna l-kontra.  Jekk però, l-Oppożizzjoni kienet mgħaġġla sabiex taħsad l-affarijiet malajr, aħna konna determinati nagħmlu l-passi tagħna b’iktar direzzjoni u kalma.  Direzzjoni għax mozzjoni bħal din, li kont għidt ċar li kienet titqiegħed fuq l-aġenda parlamentari, trid li ssegwi mhux is-sistema tal-giljjottina imma dik demokratika.  Mhux dik li tnaqqas l-użu tar-raġuni, iżda li tippermettiha.

3.    Hawn xi ħadd li jista’ jagħti tort lill-Gvern li jesiġi s-serjetà u li jeżerċita d-dritt leġittimu u sagrosant tiegħu li jiddefendi ruħu?  Hemm pajjiżi li m’humhiex demokratiċi u hemm ukoll bnedmin li huma anti-demokratiċi li jippretendu li jgħodd biss dak li jgħidu huma u jiddettaw lil ħaddieħor x’għandu jagħmel.  Dawn is-soltu ssibhom iressqu proposti li bihom ineħħu jew jillimitaw id-dritt tal-libertà tal-espressjoni ta’ min ma jaqbilx magħhom  Fortunatament, il-pajjiż jaf biċ-ċert li l-Partit Nazzjonalista, kienu x’kienu ċ-ċirkostanzi, ma marx lura mill-prinċipji demokratiċi tiegħu.  Huwa miftuħ għall-konvinzjoni, iżda magħluq għall-impożizzjoni.

4.    Dan deher iktar tul dawn il-jiem meta d-diskussjoni fuq is-sitwazzjoni politika saret b’intensità u b’attenzjoni fi ħdan il-partit.  Il-Grupp Parlamentari ltaqa’ darbtejn, iltaqa’ l-Eżekuttiv u issa fl-aħħar tal-ġimgħa li ġejja ser ikollna l-Kunsill Ġenerali.  Kull min ried ħa sehem u kull min irid jista’ jsemma’ leħnu.  Il-partit ma ppruvax jiġri, anzi wisq u wisq inqas ma daħal f’mekkaniżmi ta’ kundanni jew diskors vojt jew żbaljat.  Id-demokrazija li nemmnu fiha titlob diskussjoni kalma li ssir, kif għidna u kif għandha ssir – bil-kalma u bl-irġulija.

5.    Il-poter narawh bħala responsabbiltà, piż, salib li wieħed irid iġorr u  mhux mod ieħor għax inkella ninħakmu.  Huwa strument u għodda mhux għall-vanaglorja, iżda sabiex bih titwettaq is-sewwa.  Biex dan iseħħ hemm bżonn attenzjoni, formazjoni u esperjenza.  Biex tmexxi pajjiż trid mhux biss talenti tajbin jew kampanji propagandistiċi tajba, iżda trid titbaskat taħt id-direzzjoni tal-fuħħari.  Proprju għax il-Prim Ministru Lawrence Gonzi għandu talenti tajbin li qegħdin nimxu ‘l quddiem b’riżultati mill-iktar pożittivi għal pajjiżna, huma x’inhuma l-isfidi li kkonfrontajna u jonqosna nikkonfrontaw.

6.    Fl-aġġornament tas-seduta tal-Erbgħa, elenkajt id-diversi abbozzi ta’ liġijiet li jinsabu pendenti fil-Parlament, sija fit-tieni stadju, kif ukoll quddiem il-Kumitat għall-Konsiderazzjoni ta’ Abbozzi ta’ Liġijiet.  Fl-istess waqt, tul il-ġimgħa kellna kwantità kbira ta’ riżultati pożittivi u, fl-istess ħin, inizjattivi ġodda.  Ma’ kull ġurnata, kull Ministeru ħa ħsieb jindika b’mod mill-iktar ċar li dan huwa Gvern ħaj, mimli enerġija u attenzjoni sabiex il-pajjiż u l-poplu jkomplu jikbru u jissudaw ruħhom minkejja d-diffikultajiet u l-kumplikazzjonijiet finanzjarji.  M’hemmx dubju li l-jiem parlamentari li ġejjin ser ikunu interessanti, però fl-istess ħin irridu nkomplu nagħmlu ħilitna għall-ġid komuni.  Insegwu b’konvinzjoni l-eżempju tal-omm it-tajba quddiem Salamun.

7.    Nagħlaq billi nirringrazzja lil kull min daħal fil-blog tiegħi fuq carmmifsudbonnici.blogspot.com u qara dak li hemm għar-riflessjoni politika.