Inħarsu ‘l quddiem

 

 

1.         Irridu nirreġistraw li tul din il-leġislatura saru diversi passi li permezz tagħhom pajjiżna mexa ‘l quddiem.  Huwa minnu li, iddur fejn iddur, tara dan it-tibdil.  Toroq kompletament ġodda, l-ambjent tagħna nbidel għall-aħjar, ġew introdotti liġijiet u proċeduri amministrattivi differenti li, fl-aħħar mill-aħħar, għollew il-kwalità tal-ħajja.  Ħadd ma jista’ jgħid li l-pajjiż ġie traskurat, anzi f’diversi setturi konna ambizzjużi ħafna.

 

2.         Verament sar xogħol tajjeb li però jew ma wasalx biżżejjed għand il-poplu jew, jekk wasal, kien hemm min kerrħu fix-xejn.  Dan il-Gvern kellu d-diffikultajiet tiegħu.  Kellu maġġoranza parlamentari ġejja u sejra, daqqa naħa u daqqa oħra.  Kellu kumplikazzjonijiet straordinarji marbuta mal-kriżi ekonomika fiż-żona Ewropea, kif ukoll f’dik marbuta mal-gwerra ċivili Libjana.  Minkejja dan, baqa’ jaħdem u jirreġistra vantaġġi għall-poplu.

 

3.         Iż-żelu u d-determinazzjoni wasslu mhux biss għall-għeluq ta’ proġetti, imma wkoll għal diversi oħra li qegħdin fi triqithom.  L-effetti tal-bidla ma jinħassx mill-ewwel, imma mat-trapass taż-żmien b’wieħed kumulattiv.  Mhux biss, imma lkoll nafu li diversi tibdiliet jieħdu ż-żmien tagħhom sabiex isiru sewwa.  L-għaġġla, l-esperjenza turik li twassal għal dak li ma tridx.  Tivvantaġġja lil uħud u tara oħrajn ibatu inutilment.

 

4.         F’dawn is-snin però hemm linji ċari tal-politika tagħna li baqgħu stabbli.  It-tisħiħ tad-demokrazija, tal-istituzzjonijiet li jħarsu t-trasparenza u l-kontabilità, kif ukoll dak taż-żieda fid-drittijiet tal-poplu baqgħu kostanti.  Hemm żgur prijorità li nżammet.  Dik li tħares lit-tfal billi tagħtihom iktar attenzjoni diretta.

5.         Tul dawn l-aħħar snin għamilna numru ta’ passi.  Daħħalna proċeduri ġodda kif jixhdu t-tfal fil-Qorti permezz tal-video conferencing, u li din tiġi reġistrata viżivament sabiex ma jkunx hemm bżonn li jerġgħu jitilgħu mill-ġdid.  Rajna d-dħul fis-sistema ta’ ġudikanti speċjalizzati f’din il-linja.  Emendajna l-Kodiċi biex inżidu fil-protezzjoni tal-minuri f’każijiet ta’ pornografija, solleċitar minn fuq l-internet jew turiżmu sesswali.  Mhux biss, imma introduċejna reġistru għall-protezzjoni tal-minuri, li huwa fost l-iktar avvanzati fl-Ewropa.

6.         Dawn huma żgur passi tajba.  Magħhom kellna tnejn oħra li kien jimmerita li jsiru però, sforz dak li seħħ, baqgħu mhux konklużi.  Dawn kienu marbuta mad-delinkwenza minorili.  L-ewwel, kien hemm abbozz ta’ liġi li baqa’ mhux diskuss u li permezz tiegħu konna qed nibdlu ta’ taħt fuq l-età tar-responsabbiltà kriminali.  It-tieni, kien hemm fl-istess abbozz, mekkaniżmu ġdid ta’ kif tieħu ħsieb minuri li xxellfu mad-droga sabiex flok jiġu mressqu ‘l Qorti, jkunu jistgħu jintbagħtu għall-kura.  It-tielet, sabiex dawk li jispiċċaw kundannati l-ħabs, flok imorru Kordin jintbagħtu f’post barra fejn jiġu reintegrati aħjar.  Fil-verità, il-Gvern wettaq ħafna.  Però, ta’ wieħed li jħares fis-sustanza l-interessi tal-poplu, għad fadallu iktar xi jwettaq.  Għalhekk, inħarsu ‘l quddiem sabiex dan isir, u kif għandu.